लोकांचे सेवे खातीर गोंय पुलीस
बळगें ते सेवा ही मोख बदलपाचे दिश्टीन गोंय पुलिशेन वेगवेगळीं पावलां उबारून बदल सातत्त्यान उदरगत केल्या. पुलिसां भितर सुसंस्कृतायेची एक व्हड शक्त आसता अशें फिल्ड मार्शल किचनेरान म्हणलां. पुराय समाज बदलपाची तांक आशिल्ली आनी तातूंतल्यान समाजमनाचेर परिणाम करपा सारकी ही शक्त आसता.
भारतीय पुलिशेचो इतिहास जर आमी पळयत जाल्यार आपलें काम करतना समाजांत परिवर्तन हाडपा खातीर पुलिशेन केल्ल्या सुधारणाच्यो कितल्योशोच देखी मेळटात.
गोंयच्या इतिहासांत 8 जून ह्या दिसाक खेरीत म्हत्व आसा. बद्द 43 वर्सां आदीं ह्याच दिसा लश्करी प्रशासनाकडल्यान नागरी प्रशासनाकडेन सत्तांतर जाल्लें. पुलीस हें नागरी प्रशासनाचें एक म्हत्वाचें आंग, देखून गोंय पुलीस हो दीस गोंय पुलीस दीस म्हूण मनयता आनी पुराय सोमान गोंय पुलीस सप्तक म्हूण मनयता.
ह्या सप्तकांत पुलीस आनी नागरीक हांचे संबंधांक प्राधान्य दितात आनी रान खात्याच्या सहकार्यान वृक्षारोपण करपा सारक्या कार्यावळींतल्यान सामाजीक संबंद जोडप, रस्तो सुरक्षा आनी गुन्यांव प्रतिबंधा खातीर परिसंवाद आनी भासाभासो करून जनजागृती करप असल्या कार्यावळींक प्राधान्य दितात. सेवाभावाकडेन आशिल्ली लागणूक, स्वताक कुशीक दवरून समाजा खातीर वेवसायीक पद्दतीन आनी सत्यनिष्ठेन वावुरपाची जापसालदारकी आनी कायद्याचे फास्केंत रावन पारदर्शक पद्तीन वावुरपाचें हें प्रतीक; तेंयबी कसलोच भंय बाळगिनासतना, पक्षपातीपण करिनासतना आनी पूर्वग्रह दवरिनासतना.
- पुलीस अधिकाऱ्यांचे दूरभास क्रमांक
- गोंय पुलिशेची वॅबसायट
